ឯកឧត្តម បណ្ឌិត ចាន់ ដារ៉ុង ប្រធានក្រុមការងាររាជរដ្ឋាភិបាលចុះជួយមូលដ្ឋានស្រុកសាមគ្គីមានជ័យ ខេត្តកំពង់ឆ្នាំង បើកវេទិកាសាធារណៈ ដើម្បីទទួលព័ត៌មានពីប្រជាពលរដ្ឋក្នុងមូលដ្ឋាន
ខេត្តកំពង់ឆ្នាំង ៖ នាព្រឹកថ្ងៃសុក្រ ៣រោច ខែស្រាពណ៍ ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី៧ ខែសីហា ឆ្នាំ២០២០ ឯកឧត្តម បណ្ឌិត ចាន់ ដារ៉ុង រដ្ឋលេខាធិការ ក្រសួង អភិវឌ្ឍន៍ ជនបទ និង ជាប្រធានក្រុមការងាររាជរដ្ឋាភិបាលចុះមូលដ្ឋានស្រុកសាមគ្គីមានជ័យ ព្រមទាំងឯកឧត្តម លោកជំទាវ អនុប្រធាន ក្រុមការងារ រួមជាមួយ សមាជិក សមាជិកា ក្រុមការងាររាជរដ្ឋាភិបាលចុះមូលដ្ឋានស្រុកសាមគ្គីមានជ័យ បានបើកវេទិកាសាធារណៈ ដើម្បីជម្រាបជូនអំពីស្ថានភាពនយោបាយ សមិទ្ធិផលនានារបស់រាជរដ្ឋាភិបាល ស្វែងយល់ស្ថានភាពជីវភាពរស់នៅ ក្តីកង្វល់ និងស្វែងរកដំណោះស្រាយជូនប្រជាពលរដ្ឋក្នុងឃុំក្រាំងល្វា។
សមាសភាពចូលរួមសរុបចំនួន ៩៩ នាក់ ស្រី ១៨ នាក់ ក្នុងនោះមានតំណាងប្រជាពលរដ្ឋចូលរួមចំនួន ៤៩ នាក់ ស្រី ១៣ នាក់។ ពិធីរៀបចំនៅបរិវេណវត្តក្រាំងល្វា ស្ថិតក្នុងឃុំក្រាំងល្វា ស្រុកសាមគ្គីមានជ័យ ខេត្តកំពង់ឆ្នាំង។
អង្គវេទិកាបានផ្ដល់ឱកាសឱ្យប្រជាពលរដ្ឋ លើកឡើងជាសំណួរ សំណូមដោយផ្ទាល់មាត់ និងជាលិខិត ក្នុងនោះមានចំនួន ៣០ ករណី ដែលមានបញ្ហាទំនាស់ដីធ្លីចំនួន ១៩ ករណី, ស្នើសុំជួសជុលផ្លូវ ៥ ករណី, តភ្ជាប់បណ្តាញអគ្គិសនី ៤ ករណី, ជីកប្រឡាយទឹក ១ ករណីនិងជីកអណ្តូងស្នប់ ១ ករណី ស្មើនឹងអណ្តូង ចំនួន ៣។ ក្នុងនោះក្រុមការងារ អាជ្ញាធរ និងមន្ទីរជំនាញបានធ្វើការបកស្រាយបំភ្លឺ ហើយសំណើរ និងសំណូមពរ ដែលនៅសេះសល់ក្រុមការងារ និងធ្វើការដោះស្រាយបន្ត ដោយកំណត់ពេលប្រជុំដោះស្រាយតាមករណីនីមួយៗ នៅពេលក្រោយ។
នៅចុងបញ្ចប់ ឯកឧត្តម ប្រធានក្រុមការងារ បានធ្វើការណែនាំដល់ប្រជាពលរដ្ឋ សូមមានការប្រុងប្រយ័ត្ន និងត្រូវធ្វើអនាម័យជាប្រចាំ ដើម្បីការពារពីជម្ងឺកូវីដ១៩ ហើយត្រូវអនុវត្តតាមវិធានការរបស់រាជរដ្ឋាភិបាលកម្ពុជា និងតាមគោលកាណ៍ ណែនាំរបស់ក្រសួងសុខាភិបាលឱ្យបានជាប្រចាំ ក្នុងនោះឯកឧត្តមប្រធានបានផ្តាំផ្ញើ និងធ្វើការណែនាំដល់សមាជិក សមាជិកា ក្រុមការងារ ពិសេសអាជ្ញាធរគ្រប់លំដាប់ថ្នាក់ ត្រូវតែយកចិត្តទុកដាក់ កំណត់អត្តសញ្ញាណវត្តអារាម និងប្រជាពលរដ្ឋដែលមានការខ្វះខាតនៅក្នុងភូមិទាំងអស់ នៃឃុំទាំង០៩ ក្នុងស្រុកសាមគ្គីមានជ័យ ៕
