ឯកឧត្តម គង់ លីវ៉ា បានអញ្ជើញអមដំណើរ សម្ដេចកិត្តិសង្គហបណ្ឌិតម៉ែន សំអន ព្រមទាំងថ្នាក់ដឹកនាំ ចុះពិនិត្យមើលទីតាំងរៀបចំអង្គកឋិនទានដង្ហែមកកាន់វត្តខ្មែរនៅកម្ពុជាក្រោម (វត្តស្វាយសៀមថ្មី)

នារសៀលថ្ងៃទី២១ ខែតុលា ឆ្នាំ ២០២៤ ឯកឧត្តម គង់ លីវ៉ា បានអញ្ជើញអមដំណើរ សម្ដេចកិត្តិសង្គហបណ្ឌិត ម៉ែន សំអន ព្រមទាំងថ្នាក់ដឹកនាំគណៈកម្មការរៀបចំអង្គកឋិនទានដង្ហែមកកាន់វត្តខ្មែរនៅកម្ពុជាក្រោម ចុះពិនិត្យមើលទីតាំងវត្តស្វាយសៀមថ្មីដែលនឹងត្រូវដង្ហែអង្គកឋិនមកកាន់នាដើមខែវិច្ឆិកាខាងមុខនេះ។

គួរបញ្ជាក់ផងដែរថា អង្គកឋិនទានមហាសាមគ្គីនេះ ត្រូវបានផ្តួចផ្តើមឡើងដោយសម្តេចតេជោ ហ៊ុន សែន ប្រធានព្រឹទ្ធសភាកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន។

បន្ទាប់ពីសូត្រមន្តនៅក្នុងប្រទេសកម្ពុជានៅថ្ងៃទី០៣ ខែវិច្ឆិកាហើយនោះ អង្គកឋិនទាននឹង ដង្ហែដោយសម្តេចកិត្តិព្រឹទ្ធបណ្ឌិត ទៅកាន់វត្តពោធិ៍គិរីវង្សារាម ហៅវត្តស្វាយសៀមថ្មី ស្ថិតនៅភូមិស្វាយសៀម ឃុំង៉ាយស្វៀង ស្រុកថ្កូវ ខេត្តព្រះត្រពាំង នៅថ្ងៃទី០៤ ខែវិច្ឆិកា ឆ្នាំ២០២៤។