វិនិយោគិនចិនគ្រោងបង្កើតរោងចក្រកែច្នៃអំបិលនៅខេត្តកំពត-កែប ដើម្បីបំពេញតម្រូវការទីផ្សារអំបិលក្នុងស្រុក និងការនាំចេញ
ខេត្តកំពត ៖ វិនិយោគិនចិនគ្រោងបង្កើតរោងចក្រកែច្នៃអំបិលនៅខេត្តកំពត-កែប ដើម្បីបំពេញតម្រូវការទំាងទីផ្សារអំបិលក្នុងស្រុក និងការនាំចេញ។
លោក ប៊ុន បារាំង ប្រធានសហគមផលិតអំបិលខេត្តកំពត បានឲ្យដឹងថា ក្រុមហ៊ុនរបស់ប្រទេសចិនបានត្រៀមចុះសិក្សាពីគម្រោងបង្កើតរោងចក្រនេះហើយ ប៉ុន្តែមិនទាន់ប្រកាសជាសាធារណៈនៅឡើយទេ ដោយរងចាំស្ថានភាពជម្ងឺកូវីដ១៩ ស្ងប់ស្ងាត់សិន។ លោកប្រធានសមាគមបានបញ្ជាក់ថា គម្រោងបង្កើតរោងចក្រកែច្នៃអំបិលមានសារៈសំខាន់ ណាស់ដើម្បីជំរុញការផលិតអំបិលនៅកម្ពុជាឲ្យកាន់តែមានគុណភាព ឆ្លើយតបបានតម្រូវការទីផ្សារ ខណៈបច្ចុប្បន្នរោងចក្រផលិតអំបិលនៅខេត្តកំពតមានសភាពចាស់ទ្រុឌទ្រោមផលិតមិនតាមតម្រូវការ។ លោក សង្ឃឹមនិងជឿជាក់ថា ក្រោយបញ្ចប់កូវីដ១៩ រោងចក្រមួយនេះអាចនឹងមានវត្តមាននៅលើទឹកដីកម្ពុជា។ រោងចក្រដែល វិនិយោគិនចិនមកសហការ គឺជួយការបំលែងអំបិលពីគ្រួស ឲ្យទៅជាម៉ដ្ឋដែលអាចប្រើសម្រាប់ហូបបាន ដោយសារអំបិលពេលយកពីស្រែមកជាអំបិលគ្រួស យើងយកមកកែច្នៃអោយជាអំបិលម៉ត់ដាក់ជាកញ្ចប់ៗ។ យើងសព្វថ្ងៃនេះយើងកំពុងខ្វះខាតរោងចក្រកែច្នៃអំបិលគ្រួសមកជាអំបិលម៉ត់ ទើបយើងកំពុងទំនាក់ទំនងខាងចិនឲ្យគាត់ជួយ។ លោកបន្តថា ការផលិតអំបិលក្នុងឆ្នាំ២០២០នេះ រំពឹងថានឹងប្រមូលបានប្រមាណ៨ម៉ឺនតោន លើផ្ទៃដីជាង ៤,០០០ហិកតា។
សូមបញ្ជាក់ថា បច្ចុប្បន្នក្រុមផលិតអំបិលមានចំនួន២០០ក្រុមសាមគ្គីហើយចែកចេញជា៧មណ្ឌល គឺមាន នៅក្នុងស្រុកទឹកឈូ ក្រុងកំពត សេះស ស្រុកកំពុងត្រាច និងកែប។ ក្នុងមួយឆ្នាំកម្ពុជាត្រូវការអំបិលប្រមាណ១០ម៉ឺនតោនសម្រាប់ប្រើប្រាស់ក្នុងស្រុក ។
