គណៈកម្មាធិការពិគ្រោះយោបល់ កិច្ចការស្ត្រីកុមារខេត្តកណ្តាល សំណូមពរឱ្យសមត្ថកិច្ចមូលដ្ឋាន បន្តពង្រឹងអនុវត្តច្បាប់ ការពារទប់ស្កាត់ ការបំពានលើសិទ្ធិស្ត្រីនិងកុមារ
ខេត្តកណ្តាល៖ នៅព្រឹកថ្ងៃទី០២ ខែកក្កដា ឆ្នាំ២០២០នេះ គណៈកម្មាធិការពិគ្រោះយោបល់ កិច្ចការស្ត្រីកុមារខេត្តកណ្តាល (គ.ក.ស.ក ) បានបើកកិច្ចប្រជុំ សាមញ្ញលើកទី១២ អណត្តិទី៣របស់នៅសាលាខេត្តកណ្តាល គោលបំណងដើម្បីប្រមើមើលពីវឌ្ឈនភាពនៃការអនុវត្តផែនការ សកម្មភាពការងារប្រចាំខែមិថុនា និងដាក់ចេញនូវផែនការសកម្មភាពសម្រាប់បន្តអនុវត្តនៅខែខាងមុខទៀត។
ក្នុងកិច្ចប្រជុំ បានលើកយករបៀបវារៈជាច្រើនមកពិនិត្យពិភាក្សា ពាក់ពន្ធ័នឹងស្ថានភាពស្ត្រីនិងកុមារ ក្នុងបរិបទដែលខេត្តកណ្តាល កំពុងយកចិត្តទុកដាក់ខ្ពស់ រួមគ្នាដោះស្រាយបញ្ហាប្រឈមនានាដែលកើតមានឡើង នៅក្នុងដំណាក់កាលបច្ចុប្បន្ននៃការរាតត្បាតនៃជម្ងឺកូវីដ-១៩ ។
លោកជំទាវ នួននារតី ប្រធាន គ.ក.ស.ក ខេត្តកណ្តាល បានវាយតម្លៃខ្ពស់ចំពោះវិធានការ និងយន្តការទាំងឡាយដែលមន្ត្រីជំនាញទទួលបន្ទុកការងារស្ត្រី-កុមារ នៅថ្នាក់មូលដ្ឋានប្រកាន់យកនូវវិធានការនានាជាច្រើន ក្នុងការអប់រំផ្សព្វផ្សាយទប់ស្កាត់ និងបានគ្នារួមដោះស្រាយបានល្អប្រសើរលើការបំពានចំពោះ សិទ្ធិស្ត្រីនិងកុមារនាពេលបច្ចប្បន្ននេះ។
លោកជំទាវប្រធាន បានសំណូមពរអោយអាជ្ញាធរ មានសមត្ថកិច្ចគ្រប់លំដាប់ថ្នាក់នៅក្នុងមូលដ្ឋាន បន្តពង្រឹងការអនុវត្តច្បាប់ក្នុងការបង្ក្រាបទប់ស្កាត់ អំពើកេងប្រវ័ញ្ច ពលកម្មកុមារ អំពើហឹង្សាក្នុងគ្រួសារ និងអំពើជួញដូរផ្លូវភេទជាដើម ដើម្បីយកជនល្មើសនោះ មកផ្តន្ទាទោសតាមផ្លូវច្បាប់៕
