រដ្ឋមន្ត្រីការពារជាតិស្លូវ៉ាគី បាននិយាយកាលពីថ្ងៃអាទិត្យថា សមាជិកណាតូ ស្លូវ៉ាគី បានចាប់ផ្តើមទទួលប្រព័ន្ធការពារដែនអាកាស Patriot ជាលើកដំបូង ដែលជាកម្មសិទ្ធិរបស់ប្រទេសអាល្លឺម៉ង់ និងហូឡង់។
លោក Jaroslav Nad បាននិយាយនៅលើប្រព័ន្ធផ្សព្វផ្សាយសង្គម ដោយបានសម្តែងការថ្លែងអំណរគុណយ៉ាងជ្រាលជ្រៅដល់ប្រទេសអាល្លឺម៉ង់ និងហូឡង់ ជុំវិញការដាក់ពង្រាយការផ្គត់ផ្គង់អាវុធចំពេលមានសង្រ្គាមរុស្ស៊ី-អ៊ុយក្រែន ហើយបាននិយាយថា “ធាតុដំបូងនៃការការពារដែនអាកាស Patriot” កំពុងមកដល់ប្រទេសស្លូវ៉ាគី។
ទន្ទឹមនឹងនេះ លោក Nad បានសង្កត់ធ្ងន់ថា ប្រព័ន្ធ Patriot មិនមែនជាការជំនួសប្រព័ន្ធ S-300 របស់រុស្ស៊ីនោះទេ ខណៈដែលលោកក៏បានកត់សម្គាល់ផងដែរថា ប្រទេសស្លូវ៉ាគី មានគម្រោងផ្លាស់ប្តូរប្រព័ន្ធ S-300 ដោយសារតែលក្ខខណ្ឌបច្ចេកទេស អាយុកាល និងសមត្ថភាពមិនគ្រប់គ្រាន់។
លោកក៏បាននិយាយផងដែរថា ទាហានប្រហែល 2,100 នាក់មកពីសមាជិកណាតូ នឹងត្រូវដាក់នៅស្លូវ៉ាគីជាផ្នែកនៃបេសកកម្មផងដែរ៕
