អភិបាលខេត្តកំពង់ចាម បានថ្លែងអំណរគុណ និងជម្រុញដល់ម្ចាស់រោងចក្រ បន្តអប់រំណែនាំដល់កម្មករ កម្មការិនី ឲ្យម្ចាស់ការ ថែរក្សាអនាម័យជានិច្ច ជាពិសេសការអនុវត្តទៅតាមការណែនាំ របស់ក្រសួងសុខាភិបាល
ខេត្តកំពង់ចាម ៖ នាព្រឹកថ្ងៃទី១៦ ខែមេសា ឆ្នាំ២០២០ នេះ ឯកឧត្តម អ៊ុន ចាន់ដា អភិបាលខេត្ត និងជាប្រធានគណៈកម្មការប្រយុទ្ធប្រឆាំងនឹងជម្ងឺកូវីដ-១៩ ខេត្តកំពង់ចាម បានថ្លែងអំណរគុណ និងជម្រុញដល់ម្ចាស់រោងចក្រ បន្តអប់រំណែនាំដល់កម្មរ កម្មការិនី ឲ្យម្ចាស់ការ ថែរក្សាអនាម័យជានិច្ច រហូតដល់ពិភពលោក មានវ៉ាក់សាំងចាក់ការពារជម្ងឺកូវីដ-១៩ ។
នាព្រឹកថ្ងៃទី១៦ ខែមេសា ឆ្នាំ២០២០ នេះ ឯកឧត្តម អ៊ុន ចាន់ដា អភិបាលខេត្ត និងជាប្រធានគណៈកម្មការប្រយុទ្ធប្រឆាំងនឹងជម្ងឺកូវីដ-១៩ ខេត្តកំពង់ចាម រួមដំណើរជាមួយ ឯកឧត្ដម ខ្លូត ផន ប្រធានក្រុមប្រឹក្សាខេត្ត និងឯកឧត្ដម លោកជំទាវ ជាអភិបាលរងខេត្ត ថ្នាក់ដឹកនាំមន្ទីរ អង្គភាពពាក់ព័ន្ធ ព្រមទាំង អាជ្ញាធរមូលដ្ឋាន ជួបពិភាក្សាការងារជាមួយម្ចាស់រោងចក្រ និងចុះសួរសុខទុក្ខផ្ទាល់ ជាមួយបងប្អូនកម្មករ កម្មការិនី នៅរោងចក្រ មីត ធិច កម្ពុជា ខប លីមីតធីត (MEDTECS Cambodia Corp Limited) ស្ថិតនៅឃុំអំពិល ស្រុកកំពង់សៀម ខេត្តកំពង់ចាម នៅព្រឹកថ្ងៃទី១៦ ខែមេសា ឆ្នាំ២០២០ នេះ ។
ក្នុងឱកាសនោះដែរ ឯកឧត្ដម អ៊ុន ចាន់ដា មានប្រសាសន៍ថ្លែងអំណរគុណ ចំពោះ ម្ចាស់រោងចក្រ ដែលបានសហការ ក៏ដូចជា ការចូលរួមចំណែកជាមួយរាជរដ្ឋាភិបាលកម្ពុជា ក្នុងការអនុវត្តនូវសេក្ដីសម្រេចលេខ ០២ ប.ប ស្ដីពីការដាក់កំហិតលើការធ្វើដំណើរក្នុងប្រទេស ក្នុងគោលដៅ បង្ការទប់ស្កាត់ការរាត្បាត នៃជម្ងឺកូវីដ ១៩ ជាពិសេស ការណែនាំអប់រំដល់កម្មករ កម្មការិនីយើង ឲ្យមកបំពេញការងារ ទៅតាមតួនាទី ភារកិច្ចរៀងៗខ្លួនប្រកបដោយការទទួលខុសត្រូវ និងទឹកចិត្តសប្បាយរីករាយ ។ លើសពីនេះទៅទៀតនោះ ម្ចាស់រោងចក្រ ក៏បានធ្វើការអប់រំណែនាំ ដល់បងប្អូនយើង ចូលរួមថែរក្សាអនាម័យ តាមរយៈ ការលាងដៃជាមួយសាប៊ូ ឬអាល់កុល និងការវាស់កំដៅមុនពេលចូលធ្វើការ ដើម្បី បង្ការការឆ្លង នៃជម្ងឺកូវីដ ១៩ ទៅអ្នកដទៃ ដែលកំពុងបំរើការងារនៅក្នុងរោងចក្រនោះ ។ ដោយឡែក បើទោះបីជាពេលនេះ ខេត្តកំពង់ចាម បានបិទការព្យាបាលជម្ងឺកូវីដ-១៩ យ៉ាងណាក្ដី តែយើងទាំងអស់គ្នា នៅតែបន្តការប្រុងប្រយ័ត្នជានិច្ច ជាពិសេសការអនុវត្តទៅតាមការណែនាំ របស់ក្រសួងសុខាភិបាល ដើម្បីបញ្ជៀសការឆ្លងនៃមេរោគដ៏កាចសាហាវមួយនេះឲ្យខានតែបាន ។
ឯកឧត្ដម អ៊ុន ចាន់ដា ក៏បានថ្លែងអំណរគុណចំពោះរោងចក្រ Medtecs ដែលកន្លងមក បានជួយឧបត្ថម្ភនូវម៉ាស់ និងសម្លៀកបំពាក់មួយចំនួន ដល់គណៈកម្មការប្រឆាំងជំងឺឆ្លងកូវីដ-១៩ នៅខេត្តកំពង់ចាម សម្រាប់ផ្ដល់ជូនក្រុមគ្រូពេទ្យនៅក្នុងខេត្តកំពង់ចាម ដើម្បីផ្ដល់សេវាព្យាបាលថែទាំអ្នកជម្ងឺកូវីដ-១៩ ដែលមកសម្រាកព្យាបាលនៅមន្ទីរពេទ្យខេត្តកំពង់ចាមផងដែរ ។
សូមបញ្ជាក់ថា បច្ចុប្បន្ននៅទូទាំងខេត្តកំពង់ចាមមានរោងចក្រធំៗសរុបចំនួន ១៧កន្លែង និងមានកម្មករសរុបចំនួន ៣២.៨៦៨នាក់ ក្នុងនោះស្រី ៣១.០៥៥នាក់ ។ ដោយឡែក រោងចក្រ (MEDTECS Cambodia Corp Limited) មានកម្មករសរុបចំនួន ៣.៥៤៦នាក់ ស្រី ៣.២៧៥នាក់ ។ បច្ចុប្បន្នរោងចក្រមួយនេះ បានផលិតសម្ភារៈផ្នែកវេជ្ជសាស្ត្រដូចជា សម្លៀកបំពាក់ការពារសម្រាប់គ្រូពេទ្យជាដើម ដោយនាំចេញទៅលក់ នៅក្រៅប្រទេសនៅក្នុងពិភពលោក ។ ដោយឡែកបច្ចុប្បន្ននេះ ដោយសារតែកម្ពុជាទទួលរងផលប៉ះពាល់ពីជម្ងឺកូវីដ-១៩ រោងចក្រ MEDTECS Cambodia Corp Limited ក៏បានផ្គត់ផ្គង់នូវសម្ភារៈពេទ្យមួយចំនួន ឲ្យទៅក្រសួងសុខាភិបាលកម្ពុជាសម្រាប់ប្រើប្រាស់ផងដែរ ៕ ប្រភព៖មន្ទីរព័ត៌មានខេត្តកំពង់ចាម
