ឯកឧត្តម ហ៊ុន ម៉ាណែត តំណាងសម្តេចតេជោ នាំយកពូជស្រូវនិងអំណោយចែកជូនពលរដ្ឋរងគ្រោះជំនន់ទឹកភ្លៀង ចំនួន ១១.០០០គ្រួសារ នៅខេត្តបន្ទាយមានជ័យ
ខេត្តបន្ទាយមានជ័យ ៖ នាព្រឹកថ្ងៃ១០រោច ខែកត្តិក ឆ្នាំជូត ទោស័ក ព.ស.២៥៦៤ ត្រូវនឹងថ្ងៃអង្គារ ទី១០ ខែវិច្ឆិកា ឆ្នាំ២០២០នេះ ប្រជាពលពលរដ្ឋជាង ១ម៉ឺនគ្រួសារនៅក្នុងខេត្ត បន្ទាយមានជ័យ ដែលទទួលរងដោយសារជំនន់ទឹកភ្លៀង កាលពីខែតុលាកន្លងមកនេះបាន ទទួលពូជស្រូវនិងអំណោយរបស់រាជរដ្ឋាភិបាលកម្ពុជាដើម្បីជួយស្តារការបង្កបង្កើនផលដំណាំស្រូវ និងបន្លែបង្ការឡើងវិញនិងសម្រួលដល់ជីវភាពរស់នៅ ដែលកំពុងជួបការលំបាកដោយ សារតែការបំផ្លាញពីគ្រោះមហន្តរាយធម្មជាតិនេះ។
អំណោយដ៏ថ្លៃថ្លានេះត្រូវបានឯកឧត្តម ឧត្តមសេនីយ៍ឯក ហ៊ុន ម៉ាណែត អគ្គមេបញ្ជា ការរងកងយោធពលខេមរភូមិន្ទ ជាមេបញ្ជាការកងទ័ពជើងគោក តំណាងដ៏ខ្ពង់ខ្ពស់សម្តេច អគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា រួមនឹងក្រុមការងារបានអញ្ជើញសួរសុខទុក្ខ ដោយចែកពូជស្រូវ និងអំណោយជូនពលរដ្ឋរងគ្រោះ ជំនន់ទឹកភ្លៀងក្នុងខេត្តបន្ទាយមានជ័យ ចំនួន ១១.០០០គ្រួសារនេះ ដែលបានរៀបចំនៅក្នុង បរិវេណផ្សារធំថ្មីបូរីជ័យII ភូមិចំការតាដោក ឃុំឫស្សីក្រោក ស្រុកមង្គលបូរី ។
ក្នុងឱកាសនោះ ឯកឧត្តមឧត្តមសេនីយ៍ឯក ហ៊ុន ម៉ាណែត បានមានប្រសាសន៍ថាសម្តេចតេជោទោះនាពេលនេះមិនបានអញ្ជើញមកផ្ទាល់ក៏ដោយ ក៏សម្តេចតែងតែគិតគូរជា និច្ចដល់សុខទុក្ខ ជីវភាពរស់នៅរបស់ប្រជាពលរដ្ឋ ជាពិសេសនោះចំពោះប្រជាពលរដ្ឋរង គ្រោះ ងាយរងគ្រោះដែលជួបការលំបាកដោយប្រការផ្សេងៗ នៅគ្រប់ទីកន្លែងទាំងអស់។ក្នុងនាមសម្ដេចតេជោនាយករដ្ឋមន្ត្រីឯកឧត្តម ហ៊ុន ម៉ាណែត ក៏បានថ្លែងអំណរគុណ ថ្នាក់ដឹកនាំគ្រប់លំដាប់ថ្នាក់ អាជ្ញាធរ កងកម្លាំងគ្រប់ប្រភេទដែលបានខិតខំជួយសង្គ្រោះប្រជា ពលរដ្ឋពីគ្រោះទឹកជំនន់ និងជួយសម្រួលការចាប់ផ្ដើមជីវភាពឡើងវិញ ពិសេសការបង្កបង្កើន ផល។
ឯកឧត្តម ហ៊ុន ម៉ាណែត បានមានប្រសាសន៍ទៀតថា ថ្នាក់ដឹកនាំ និងមន្ត្រីរាជរដ្ឋាភិ បាល កើតចេញពីគណបក្សប្រជាជនកម្ពុជា ដែលប្រជាពលរដ្ឋបោះឆ្នោតគាំទ្របានប្រកាន់ ខ្ជាប់នូវប្រពៃណីផ្សាភ្ជាប់ជីវភាពរស់នៅរបស់ប្រជាពលរដ្ឋ ដោយបានបែងចែកការទទួលខុស ត្រូវឱ្យមន្ត្រីចុះតាមគ្រប់មូលដ្ឋាន ដើម្បីតាមដានបញ្ហាប្រឈម សំណូមពរនានា និងដោះ ស្រាយជូនប្រជាពលរដ្ឋឱ្យបានទាន់ពេលវេលា។ ឯកឧត្តមបានសង្កត់ធ្ងន់ថា យើងទាំងអស់គ្នា រួមសុខរួមទុក្ខជាមួយគ្នា និងមិនមានទម្លាប់រត់ចោលគ្នានោះទេ។ជាមួយនោះដែរឯកឧត្តម ក៏បានថ្លែងអំពាវនាវបងប្អូនប្រជាពលរដ្ឋចូលរួមថែរក្សា សុខភាព អនុវត្តន៍វិធានការណែនាំរបស់ក្រសួងសុខាភិបាល ឱ្យបានជាប់ជាប្រចាំដើម្បីទប់ ស្កាត់ការឆ្លងរីករាលដាលជំងឺកូវីដ-១៩ និងជំងឺរាតត្បាតផ្សេងៗទៀត។ ចូលរួមប្រយុទ្ធប្រឆាំង គ្រឿងញៀនតាមរយៈការអប់រំណែនាំកូនចៅចៀសឱ្យផុតពីគ្រឿងញៀន ។ ត្រូវចូលរួមគោរពច្បាប់ចរាចរណ៍ឱ្យបានខ្ជាប់ខ្ជួនដើម្បីចៀសផុតពីគ្រោះថ្នាក់ចរាចរណ៍នោះ។ ឯកឧត្តមក៏បាន លើកទឹកចិត្ត ជំរុញឱ្យកសិករយើងត្រូវជម្នះគ្រប់ឧបសគ្គ តស៊ូព្យាយាមដើម្បីស្តារផលិតកម្មដំណាំស្រូវ ដំណាំរួមផ្សំ និងចិញ្ចឹមសត្វ ត្រី ឡើងវិញបន្ទាប់ពីទឹកស្រកចុះ។
សូមបញ្ជាក់ថា ប្រជាពលរដ្ឋដែលបានអញ្ជើញមកទទួលអំណោយនាឱកាសនេះ មាន មកពីស្រុកមង្គលបូរី, ព្រះនេត្រព្រះ, និងក្រុងសិរីសោភណ័ណ ដោយក្នុងមួយគ្រួសារ ៗទទួល បានស្រូវពូជ ១០០គីឡូក្រាម, អង្ករ ២៥គីឡូក្រាម, ទឹកស៊ីអ៊ីវ១យួរ, ត្រីខ ១យួរ, ទឹកត្រី១យួរ, មីមួយកេស, ទឹកបរិសុទ្ធ១កេស, ភួយ១, មុង១, កន្ទេល១, និងថវិកា ៥ម៉ឺន រៀល៕
