លោកជំទាវ ម៉ែន សំអន ធ្វើអញ្ជើញមកពិនិត្យនិងប្រារព្ធពិធីបួងសួងសុំសេចក្តីសុខចម្រើនពីវត្ថុស័ក្តិសិទ្ធិជាពិសេសសត្វអណ្តើកថ្មភក់ នៅប្រាសាទកណ្តាលស្រះស្រង់
ខេត្តសៀមរាប ៖ នាព្រឹកថ្ងៃព្រហស្បតិ៍៨រោច ខែពិសាខ ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី១៤ ខែឧសភា ឆ្នាំ២០២០ លោកជំទាវ ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនង រដ្ឋសភា-ព្រឹទ្ធសភា និងអធិការកិច្ច អមដំណើរដោយឯកឧត្តម ថោង ខុន រដ្ឋមន្ត្រីក្រសួងទេសចរណ៍ លោកជំទាវ ភឿង សកុណា រដ្ឋមន្ត្រី ក្រសួងវប្បធម៌ និងវិចិត្រសិល្បៈ និងថ្នាក់ដឹកនាំអាជ្ញាធរជាតិអប្សរា បានអញ្ជើញមកពិនិត្យនិងប្រារព្ធពិធីបួងសួងសុំសេចក្តីសុខចម្រើន ពីវត្ថុស័ក្តិសិទ្ធិជាពិសេសសត្វអណ្តើកថ្មភក់ ដែលបានប្រទះឃើញនៅក្នុងការដ្ឋានកំណាយស្រាវជ្រាវបុរាណវិទ្យាប្រាសាទកណ្តាលស្រះស្រង់។
លោកជំទាវ ម៉ែន សំអន បានមានប្រសាសន៍ថា ការរៀបចំប្រារព្ធពិធីបួងសួងសុំសេចក្តីសុខចម្រើនពីវត្ថុស័ក្តិសិទ្ធិនៅក្នុងប្រាសាទកណ្តាលស្រះស្រង់នេះ គឺក្នុងគោលបំណងសូមឱ្យដំណើរការជួសជុលប្រាសាទបានសម្រេចជោគជ័យ ប្រជាជនកម្ពុជាចាកផុតពីជំងឺកាចសាហាវ និងសូមឱ្យប្រទេសកម្ពុជាមានសុខសន្តិភាពសម្បូរសប្បាយ រុងរឿងដូចបុរាណកាលជារាងរហូត។ ជាមួយគ្នានេះដែរលោកជំទាវបានកោតសរសើរចំពោះការប្រឹងប្រែងរបស់ក្រុមការងារអាជ្ញាធរជាតិអប្សរាដែលបានចំណាយកម្លាំងកាយ ប្រាជ្ញា ស្មារតី លើកស្ទួយអភិរក្សប្រាង្គប្រាសាទខ្មែរឱ្យបានប្រសើរ។
លោកបណ្ឌិត ជា សុជាតិ បុរាណវិទូនៃនាយកដ្ឋានអភិរក្សប្រាសាទក្នុងឧទ្យានអង្គរ និងបុរាណវិទ្យាបង្ការនិងជាតំណាងក្រុមកំណាយនៅការដ្ឋានប្រាសាទកណ្តាលស្រះស្រង់បានឱ្យដឹងថា តាមការសន្និដ្ឋានបណ្តោះអាសន្ន អណ្តើកថ្មភក់នេះ គឺគេប្រើសម្រាប់បញ្ចុះក្រោមគ្រឹះប្រាសាទ។ ប៉ុន្តែការសិក្សាត្រូវការពេលវេលា ហើយយើងមិនអាចសន្និដ្ឋានអ្វីមួយ ឱ្យដាច់ស្រេចនោះទេ ព្រោះថាអណ្តើកមានន័យច្រើន ដែលពិបាកកំណត់ឱ្យបានច្បាស់លាស់អំពីតួនាទីរបស់វា។ អណ្តើកត្រូវបានគេរកឃើញមិនថា តែនៅស្រុកខ្មែរនោះទេ ប៉ុន្តែថែមទាំងនៅស្រុកឥណ្ឌានិងនៅបណ្តាប្រទេសនៅក្នុងតំបន់អាស៊ីអាគ្នេយ៍មួយចំនួន។ នៅក្នុងស្នូកអណ្តើកគេធ្លាប់រកឃើញថ្មមានតម្លៃរុំដោយសន្លឹកមាស និងរបស់របរមួយចំនួនទៀតដែលអាស្រ័យទៅលើទីតាំងរកឃើញ ចំណែកឯនៅក្នុងខ្លួនអណ្តើកប្រាសាទស្រះស្រង់វិញគឺពុំឃើញមានអ្វីជារបស់មានតម្លៃដូចបានបរិយាយខាងលើទេ។ តែវាមានតម្លៃសម្រាប់ការសិក្សាអំពីការរៀបចំទុកដាក់អណ្តើកក្នុងន័យជំនឿកាលពីសម័យនោះ។
សូមបញ្ជាក់ថា ការធ្វើកំណាយជួសជុលប្រាសាទកណ្តាលស្រះសង់ជាលទ្ធផលដែលប្រទះឃើញក្នុងកំណាយស្រាវជ្រាវរួមមាន រចនាសម្ព័ន្ធសំណង់ប្រាសាទ ខ្វាត (គ្រីស្តាល់) ត្រីសូល៍ ចម្លាក់នាគក្បាល៧ និងសត្វអណ្តើកថ្មភក់ចំនួន២៕
