ក្រុមហ៊ុនចំនួនចំនួនពីរ នឹងដំឡើងឧបករណ៍ផលិតទឹកស្អាតមកពីប្រទេសចិន និងពិនិត្យលទ្ធភាពបង្កើតរោងចក្រផលិតនៅក្នុងប្រទេសកម្ពុជា
រាជធានីភ្នំពេញ ៖ កាលពីថ្ងៃទី ២៧ ខែ កក្កដា ឆ្នាំ២០២០ នៅទីស្តីការក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ លោកបណ្ឌិត Cai Yunlong នាយកក្រុមហ៊ុន Micro Purification Science & Technology (Cambodia) Co.,Ltd និងលោក Peng Ting Gang នាយកក្រុមហ៊ុនT.C.U Polys Enterprise Co.,Ltd ដែលជាក្រុមហ៊ុនផលិតឧបករណ៍សម្ភារទឹកស្អាត ការដំឡើងនូវប្រព័ន្ធប្រព្រឹត្តិកម្មទឹកស្អាតតាមបច្ចេកវិទ្យាថ្មី និងដំឡើងឧបករណ៍ផលិតទឹកស្អាតមកពីប្រទេសចិន បានប្រកាសថា ក្រុមហ៊ុននឹងពិនិត្យលទ្ធភាពបង្កើតរោងចក្រផលិតនៅក្នុងប្រទេសកម្ពុជាតែម្ដង។ ការលើកឡើងនេះ ក្នុងជំនួបសម្ដែងការគួរសម និងពិភាក្សាការងារជាមួយ ឯកឧត្តម កិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ កាលពីថ្ងៃទី ២៧ ខែ កក្កដា ឆ្នាំ២០២០ នៅទីស្តីការក្រសួង ឧស្សាហកម្ម។ នេះបើយោងតាមក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍។
លោក Peng Ting Gang ប្រធានក្រុមហ៊ុន T.C.U Polys Enterprise Co.,Ltd បានលើកឡើងពីភាពរីកចម្រើនរបស់ក្រុមហ៊ុន ដែលបានបង្កើតឡើងតាំងពីឆ្នាំ២០១៦ មក ហើយរហូតដល់បច្ចុប្បន្ន ក្រុមហ៊ុនបានផលិតនូវឧបករណ៍បម្រើឱ្យវិស័យទឹកស្អាតជាច្រើន ប្រភេទប្រកបដោយគុណភាព ដូចជា ទុយោទឹកអាចផលិតរហូតដល់មុខកាត់២ម៉ែត្រ និងមានប្រវែង ១២ ម៉ែត្រ ជាដើម។ លោកបានអះអាងថា សម្រាប់ថ្ងៃខាងមុខ ក្រុមហ៊ុនក៏មានបំណងបង្កើតមជ្ឈមណ្ឌលមន្ទីរពិសោធន៍ឧបករណ៍ផលិតទឹកស្អាតនៅកម្ពុជា និង ពិនិត្យលទ្ធភាពបង្កើតរោងចក្រផលិតនៅក្នុងប្រទេសកម្ពុជាតែម្តង។
ចំណែកលោកបណ្ឌិត Cai Yunlong នាយកក្រុមហ៊ុន Micro Purification Science & Technology (Cambodia) Co.,Ltd បានលើកឡើងអំពីកិច្ចសហប្រតិបត្តិការដែលទទួលបានជោគជ័យនៃអាជីវកម្មរបស់ខ្លួនលើវិស័យទឹកស្អាតនៅកម្ពុជា ជាពិសេសការគាំទ្រពីឯកឧត្តមកិត្តិសេដ្ឋាបណ្ឌិតទេសរដ្ឋមន្ត្រី ព្រមទាំងថ្នាក់ដឹកនាំ និងមន្ត្រីជំនាញក្រោមឱវាទ ដែលតែង តែគាំទ្រនូវគម្រោងអាជីវកម្មរបស់លោក។
ឯកឧត្តមកិត្តិសេដ្ឋាបណ្ឌិតទេសរដ្ឋមន្ត្រី ចម ប្រសិទ្ធ បានវាយតម្លៃខ្ពស់ចំពោះសមិទ្ធផលផ្លែផ្កាកើតចេញពីកិច្ចសហការរវាងក្រុមហ៊ុនទាំងពីរខាងលើ ក្នុងប្រតិបត្តិការអាជីវកម្មរបស់ខ្លួននៅកម្ពុជា ដែលបានចូលរួមវិនិយោគការអភិវឌ្ឍវិស័យទឹកស្អាតនៅកម្ពុជា ដោយក្រុមហ៊ុន Micro Purification Science & Technology (Cambodia) Co.,Ltd គឺជាអ្នកនាំចូលមកដំឡើងនូវប្រព័ន្ធប្រព្រឹត្តិកម្មទឹកស្អាតតាមបច្ចេកវិទ្យាថ្មី UF Membrane ដោយសហការជាមួយក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ លើការ ងារដំឡើងឧបករណ៍ផលិតទឹកស្អាតសម្រាប់លក់ដុំបន្ត។ ចំណែកក្រុមហ៊ុន T.C.U Polys Enterprise Co.,Ltd គឺជាក្រុមហ៊ុនដ៏ជំនាញមួយរបស់ចិន ដែលនាំចូលនូវឧបករណ៍បម្រើ ឱ្យវិស័យទឹកស្អាតមកដំឡើងចែកចាយ នៅទីផ្សារកម្ពុជា ។
ឯកឧត្តមកិត្តិសេដ្ឋាបណ្ឌិតទេសរដ្ឋមន្ត្រី ចម ប្រសិទ្ធ បានលើកឡើងពីគោលនយោបាយទឹកស្អាតរបស់ក្រសួង ក៏ដូចជារាជរដ្ឋាភិបាល ហើយលើកទឹកចិត្តជានិច្ចរាល់គម្រោងវិនិយោគលើវិស័យទឹកស្អាតសម្រាប់ជាផលប្រយោជន៍ដល់ការបម្រើជីវភាពប្រជាពលរដ្ឋទូទៅ។ ឯកឧត្ដមសង្ឃឹមថា ក្រោមគម្រោងនៃគំនិតផ្តួចផ្តើមផ្លូវមួយខ្សែក្រវាត់មួយរបស់ចិន កម្ពុជានឹងទទួលបានបន្ថែមទៀត ទាំងការវិនិយោគ និងឥណទានសម្រាប់ការអភិវឌ្ឍលើវិស័យទឹកស្អាតនៅកម្ពុជា។ ដោយឡែកទាក់ទងនិងគំនិតផ្តួចផ្តើមបង្កើតឱ្យមានមជ្ឈមណ្ឌលពិសោធន៍ឧបករណ៍ផលិតទឹកស្អាតគឺជាគំនិតស្របគ្នាជាមួយនឹងឯកឧត្តមដែរ ដែលបានគិតគូរមិនត្រឹមតែមន្ទីរពិសោធន៍ធ្វើតេស្តទេ តែត្រូវមានមជ្ឈមណ្ឌលបណ្តុះបណ្តាលជំនាញទឹកស្អាតថែមទៀត ដែលយើងត្រូវរួមសហការគ្នា។
ជាមួយគ្នានេះដែរ ឯកឧត្តមកិត្តិសេដ្ឋាបណ្ឌិតទេសរដ្ឋមន្ត្រី ចម ប្រសិទ្ធ ក៏បានឯកភាពតាមការស្នើសុំ ដោយនឹងដឹកនាំប្រតិភូក្រសួងអញ្ជើញចុះពិនិត្យដល់ទីតាំងក្រុមហ៊ុន T.C.U Polys Enterprise Co.,Ltd ដែលមានជំនាញដំឡើងឧបករណ៍ផលិតទឹកស្អាត មានទីតាំងនៅក្នុងខេត្តកំពង់ស្ពឺ ៕
