រដ្ឋមន្ត្រីក្រសួងផែនការ បានណែនាំបន្ថែមដល់ថ្នាក់ដឹកនាំ មន្ត្រីជំនាញ ត្រូវពិនិត្យតាមដាន និងដោះស្រាយការងារឧបត្ថម្ភសាច់ប្រាក់ដល់គ្រួសារក្រីក្រឱ្យបានហ្មត់ចត់
រាជធានីភ្នំពេញ ៖ នៅថ្ងៃទី០៦ ខែកក្កដា ឆ្នាំ២០២០ ឯកឧត្តមកិត្តិសេដ្ឋាបណ្ឌិត ឆាយ ថន ទេសរដ្ឋមន្ត្រី រដ្ឋមន្ត្រីក្រសួងផែនការ បានណែនាំបន្ថែមដល់ថ្នាក់ដឹកនាំ មន្ត្រីជំនាញក្រសួង មន្ត្រីមន្ទីរផែនការរាជធានី ខេត្ត ក្រុង ត្រូវពិនិត្យ តាមដាន និងដោះស្រាយការងារនេះឱ្យបានម៉ត់ចត់ ប្រុងប្រយ័ត្ន មិនត្រូវផ្តេកផ្តួល ជាពិសេសការឧបត្ថម្ភសម្រាប់តែប្រជាជនក្រីក្រ និងចុះជាប់នៅឯមូលដ្ឋានជាមួយអាជ្ញាធរឃុំ សង្កាត់ ជានិច្ច ដើម្បីក្តាប់ឱ្យជាប់សភាពការណ៍។ នេះបើយោងតាមក្រសួងផែនការ។
ថ្លែងក្នុងពិធីបើកកិច្ចប្រជុំត្រួតពិនិត្យការអនុវត្តអត្តសញ្ញាណកម្មគ្រួសារក្រីក្រ តាមការស្នើសុំក្នុងអំឡុងពេលវិបត្តិជំងឺកូវីដ-១៩ កាលពីថ្ងៃទី០៦ ខែកក្កដា ឆ្នាំ២០២០ នៅទីស្ដីការក្រសួងផែនការ ឯកឧត្តមកិត្តិសេដ្ឋាបណ្ឌិត ឆាយ ថន បានមានប្រសាសន៍ថា ថ្នាក់ដឹកនាំ មន្រ្ដីជំនាញ ត្រូវចុះជួយពន្យល់ ណែនាំអាជ្ញាធរភូមិ ឃុំ សង្កាត់ ដោយត្រូវបំបាត់ឱ្យអស់បក្សពួក និងគ្រួសារនិយម ហើយក្រសួងផែនការកំពុងដំណើរការរៀបចំយន្តការដើម្បីដោះស្រាយ និងផ្តល់តម្លាភាពដល់ប្រជាជនផងដែរ។ ឯកឧត្ដមបានថ្លែងនូវអំណរគុណដល់អភិបាលរាជធានី ខេត្ត ក្រុង និងមន្ទីរផែនការ មន្ត្រីគ្រប់លំដាប់ថ្នាក់ដែលបានសហការយ៉ាងជិតស្និទ្ធជាមួយក្រសួងផែនការ ខិតខំបំពេញការងារ និងជម្នះគ្រប់ឧបសគ្គរហូតសម្រេចបានជោគជ័យ ដែលទទួលបានទិន្នន័យគ្រួសារក្រីក្រ ជាពិសេសក្រសួងសង្គមកិច្ច អតីតយុទ្ធជន និងយុវនីតិសម្បទា កំពុងដំណើរការឧបត្ថម្ភសាច់ប្រាក់ ដែលមកទល់ថ្ងៃនេះ គ្រួសារទាំងជាង ៥៦០,០០០គ្រួសារ (ជុំទី១)ស្ទើរតែទទួលបានថវិកាដំណាក់កាលទី១ ទាំងអស់គ្នាហើយ។
យោងតាមក្រសួងផែនការបានឱ្យដឹងថា ការឧបត្ថម្ភសាច់ប្រាក់ដំណាក់កាលទី១ បញ្ចប់ការផ្តល់ក្នុងដំណាក់កាលទី២ នឹងត្រូវចាប់ផ្តើមនៅថ្ងៃទី២៥ ខែកក្កដា ឆ្នាំ២០២០ ដែលនឹងត្រូវប្រើប្រាស់ទិន្នន័យបច្ចុប្បន្នភាព ក្រោយថ្ងៃទី០១ ខែមិថុនា ឆ្នាំ២០២០ ដែលជាការបូកបញ្ចូលគ្នានៃគ្រួសារក្រីក្រនៅជនបទ និងទីប្រជុំជន ដែលទិន្នន័យគិតត្រឹមថ្ងៃទី០១ ខែកក្កដា ឆ្នាំ២០២០ (បណ្តោះអាសន្ន) មានគ្រួសារក្រីក្របានកើនចំនួន ២៤,៩១៥គ្រួសារ។
ឯកឧត្តមកិត្តិសេដ្ឋាបណ្ឌិតបានបន្តថា ទោះបីជាយើងបានព្យាយាមខិតខំសម្រេចបាននូវភារកិច្ចដ៏មានសារៈសំខាន់ជាប្រវត្តិសាស្ត្រជូនរាជរដ្ឋាភិបាល ប្រទេសជាតិ និងប្រជាជនកម្ពុជា យ៉ាងនេះក៏ដោយ ក៏យើងនៅតែមានជួបនូវបញ្ហាប្រឈមជាច្រើនដូចជា ការកំណត់ពេលផ្តល់ទិន្នន័យមានរយៈពេលខ្លីបំផុត និងទាមទារគុណភាពទិន្នន័យ ការប្រើប្រាស់ tablets ជាការប្រើប្រាស់លើកដំបូង នៅមានភាពរអាក់រអួល ទាំងប្រព័ន្ធ និង មន្រ្តី។ ទន្ទឹមនេះ ដោយសារតែរដូវនេះ ជារដូវធ្លាក់ភ្លៀង បានប៉ះពាល់ដល់ដំណើរការប្រព័ន្ធទាក់ទង ការបញ្ជូនទិន្នន័យ ការធ្វើដំណើរ ស្ថានភាពរបស់ខេត្តមិនដូចគ្នា ខ្លះឆ្ងាយ ផ្លូវពិបាក និង ខ្លះជាតំបន់កោះ និងជ្រលងភ្នំជាដើម។
តែទោះបីយ៉ាងណាក៏ដោយ ឯកឧត្តមកិត្តិសេដ្ឋាបណ្ឌិត ឆាយ ថន បានលើកឡើងថា រឿងដែលសំខាន់បំផុត និងប៉ះពាល់ដល់ការងារផ្តល់ការឧបត្ថម្ភសាច់ប្រាក់នេះ គឺ ប្រតិកម្មពីប្រជាជន ចំពោះអ្នកមានជីវភាពល្អប្រសើរនៅមានប័ណ្ណ និង ទទួលបានការ ឧបត្ថម្ភ។ ប័ណ្ណខ្លះ ផុតសុពលភាព (លើសពី៣ឆ្នាំ) មានអ្នកបំផុសឱ្យទៅទទួលការឧបត្ថម្ភ ហើយគ្រួសារក្រីក្រពិតប្រាកដមិនទទួលបានប័ណ្ណ និងការឧបត្ថម្ភ។ ចំពោះគ្រួសារខ្លះនៅ បន្តប្រើប័ណ្ណអាទិភាព Post ID របស់ក្រសួងសុខាភិបាលមកទាមទារ ហើយគ្រួសារខ្លះជា គ្រួសារចំណាកស្រុក ឬមិនមានសៀវភៅគ្រួសារនិងសៀវភៅស្នាក់នៅ។ ដោយឡែក ប័ណ្ណ រហែក ឬបាត់បាននាំគ្នាផ្ទុះការតវ៉ា ដោយផ្ទាល់ ប្រយោល ជាពិសេសតាមបណ្តាញសង្គម ទោះបីមានការពន្យល់ ណែនាំ ជាពិសេសក្រសួងផែនការតាមបណ្តាញសង្គម សារព័ត៌មាន វិទ្យុ ទូរទស្សន៍ និង ចុះដោះស្រាយដល់ទីតាំងផ្ទាល់ ក៏នៅមិនទាន់មានភាពជ្រះ ស្រឡះ និងនៅតែបន្ត។ ជាមួយនេះដែរ មានក្រុមការងារជាតិចុះតាមឃុំ សង្កាត់ ក៏នៅតែ ខិតខំជួយតាមដានការងារនេះផងដែរ។
- សូមបញ្ជាក់ថា សម្រាប់ទិន្នន័យបឋមអំពីបញ្ហា ដែលខេត្តចំនួន១៣ បានផ្តល់មក និងបានដោះស្រាយរួចរាល់រួមមាន៖ ១.ប័ណ្ណអស់សុពលភាព មានចំនួន ១៨៥ ករណី។
២.អ្នកកាន់ប័ណ្ណដែលមានជីវភាពប្រសើរឡើង មានចំនួន ២,៣៤១ ករណី (នៅសល់តែ២៣០ករណីកំពុងកាន់ប័ណ្ណ)។ ៣.អ្នកក្រដែលមិនមានប័ណ្ណ មានចំនួន ៥៩៩ ករណី។
៤.ប័ណ្ណរហែក ឬបាត់ មានចំនួន២,៧៥៣ ករណី៕
