រដ្ឋបាលស្រុកបន្ទាយស្រី ខេត្តសៀមរាប បង្កើតបណ្តាញក្រុមការងារចុះផ្សព្វផ្សាយទូទាំងស្រុក អំពីមេរោគប្រភេទថ្មី កូរ៉ូណា(កូវីដ១៩)
ខេត្តសៀមរាប ៖ រដ្ឋបាលស្រុកបន្ទាយស្រី បានសម្រេចបង្កើតដាក់បណ្តាញរបស់ខ្លួនពេញលេញភូមិទាំង៣៦ ដើម្បីចូលរួមផ្សព្វផ្សាយដល់ប្រជាពលរដ្ឋទូទាំងស្រុកឲ្យបានយល់ច្បាស់ពីវិធានការនានា ក្នុងការប្រយុទ្ធប្រឆាំងនឹងជម្ងឺ Covid-19 ។
លោក ឃឹម ហ្វីណង់ អភិបាលស្រុកបន្ទាយស្រីនៃខេត្តសៀមរាប បានដាក់ចេញឱ្យមានក្រុមការងារចម្រុះ មានសមាជិកយ៉ាងតិច ៥នាក់ ដែលដឹកនាំដោយមេភូមិនីមួយៗ និងទទួលបានការអប់រំពិសេស ឲ្យក្លាយទៅជាក្រុមជនបង្គោលនៅតាមភូមិ ដើម្បីណែនាំ ផ្សព្វផ្សាយពាក់ព័ន្ធនឹងជំងឺ ខូវីដ១៩ ដែលបានអនុវត្តអស់រយៈពេលមួយសប្តាហ៍កន្លងមកហើយ ។
ក្រុមការងារចម្រុះ បានចុះផ្សព្វផ្សាយអប់រំជាបន្តបន្ទាប់ និងមានកន្លែងផ្តល់ព័ត៌មាន ទទួលព័ត៌មាននានា ពាក់ព័ន្ធនឹងមេរោគកូវីដ១៩ ជូនដល់អ្នកភូមិ ដោយមានបំពាក់មេក្រូអចល័ត និងមេក្រូចល័ត ក្នុងភូមិយ៉ាងតិចមួយគ្រឿង ដើម្បីប្រើប្រាស់ជាមធ្យោបាយទំនាក់ទំនងជាអចិន្ត្រៃយ៍ ។
